महाराष्ट्रातील पर्यटन स्थळांचा कायापालट होणार! केंद्र सरकारने ३५६ कोटी रुपयांना मंजुरी दिली
महाराष्ट्रातील पर्यटन स्थळांना जागतिक दर्जावर नेण्यासाठी केंद्र सरकारने ३५६ कोटी रुपयांहून अधिकच्या अर्थसंकल्पाला मंजुरी दिली आहे. पुणे, नाशिक आणि सिंधुदुर्ग येथील प्रमुख प्रकल्पांचे नूतनीकरण केले जाईल.
केंद्र सरकारने महाराष्ट्रात पर्यटन पायाभूत सुविधांच्या विकासासाठी विविध योजनांअंतर्गत ३५६ कोटी रुपयांपेक्षा जास्त निधी मंजूर केला आहे. हा निधी राज्यातील प्रमुख पर्यटन प्रकल्पांसाठी स्वदेश दर्शन, स्वदेश दर्शन-२, चॅलेंज-बेस्ड डेस्टिनेशन डेव्हलपमेंट, प्रसाद आणि राज्यांना भांडवली गुंतवणुकीसाठी विशेष सहाय्य योजनेच्या माध्यमातून उपलब्ध करून दिला जाईल.
केंद्र सरकारने असे म्हटले आहे की, पर्यटन स्थळांवर पायाभूत सुविधांचा विकास करणे, पर्यटकांसाठी आवश्यक व्यवस्था करणे आणि पर्यटन अनुभव प्रदान करण्याची प्राथमिक जबाबदारी राज्य सरकारे आणि केंद्रशासित प्रदेशांवर आहे. केंद्र सरकार धार्मिक, सांस्कृतिक, वारसा आणि पर्यटन महत्त्वाच्या स्थळांच्या विकासासाठी विविध योजनांच्या माध्यमातून आर्थिक सहाय्य देत आहे.
स्वदेश दर्शन योजनेअंतर्गत, सिंधुदुर्ग किनारी पर्यटन सर्किटच्या विकासासाठी ₹१९.०६ कोटी मंजूर करण्यात आले असून, त्यापैकी ₹१७.६१ कोटी वितरित करण्यात आले आहेत. वाकी-अडासा-धापेवाडा-परडसिंगा-तेलखेडी-गिरार पर्यटन सर्किटच्या विकासासाठी ₹४५.४७ कोटी मंजूर करण्यात आले असून, त्यापैकी ₹४३.१९ कोटी वितरित करण्यात आले आहेत.
स्वदेश दर्शन-२ योजनेअंतर्गत, पुण्यातील शिवसृष्टी थीम पार्कसाठी ७५.४७ कोटी रुपयांना मंजुरी देण्यात आली आहे. यापैकी आतापर्यंत ३७.७४ कोटी रुपये वितरित करण्यात आले आहेत. चॅलेंज-बेस्ड डेस्टिनेशन डेव्हलपमेंट योजनेअंतर्गत, अहिल्यानगर किल्ल्याच्या विकासासाठी २५ कोटी रुपयांना मंजुरी देण्यात आली असून, त्यापैकी २.५० कोटी रुपये वितरित करण्यात आले आहेत.
प्रसाद योजनेअंतर्गत, नाशिकमधील त्र्यंबकेश्वर तीर्थक्षेत्राच्या विकासासाठी ४५.४१ कोटी रुपयांना मंजुरी देण्यात आली आहे . यापैकी ३८.४४ कोटी रुपये वितरित करण्यात आले आहेत. भांडवली गुंतवणुकीसाठी राज्यांना विशेष सहाय्य योजनेअंतर्गत, नाशिकमधील राम-कला पथ विकास प्रकल्पासाठी ९९.१४ कोटी रुपयांना मंजुरी देण्यात आली असून, त्यापैकी ६५.४३ कोटी रुपये वितरित करण्यात आले आहेत.
सिंधुदुर्ग जिल्ह्यातील आयएनएस गुलदार पाण्याखालील संग्रहालय , कृत्रिम प्रवाळभित्ती आणि पाणबुडी पर्यटन प्रकल्पासाठी ४६.९१ कोटी रुपयांना मंजुरी देण्यात आली आहे . या प्रकल्पासाठी आतापर्यंत ३०.९६ कोटी रुपये वितरित करण्यात आले आहेत. नागपूर जिल्ह्यातील वाकी-अडासा-धापेवाडा-परडसिंगा-तेलंगखेडी-गिराड पर्यटन सर्किटच्या विकासासाठी ४५.४७ कोटी रुपयांना मंजुरी देण्यात आली असून, त्यापैकी ४३.१९ कोटी रुपये वितरित करण्यात आले आहेत.
पर्यटन विभागाच्या म्हणण्यानुसार, स्थानिक संस्कृती, परंपरा आणि वारसा जतन करत शाश्वत आणि सर्वसमावेशक पर्यटनाला चालना देणे हा या सर्व प्रकल्पांचा उद्देश आहे. या प्रकल्पांमुळे पर्यटकांसाठी सुधारित सुविधा उपलब्ध होतील, स्थानिक रोजगाराच्या संधी वाढतील आणि राज्याच्या अर्थव्यवस्थेला चालना मिळेल, अशी विभागाला आशा आहे.
Edited By - Priya Dixit
