थंडावा देणारी आणि पौष्टिकही शाही थंडाई रेसिपी; महाशिवरात्रीच्या मुहूर्तावर नक्कीच बनवा
महाशिवरात्रीच्या मुहूर्तावर शंकराच्या पूजेत आणि प्रसादात थंडाईला विशेष महत्त्व आहे. ही थंडाई केवळ चविष्टच नाही, तर शरीराला थंडावा देणारी आणि पौष्टिकही असते. तसेच महाशिवरात्रीला थंडी संपून उन्हाळ्याची चाहूल लागत असते, अशा वेळी बडिशेप आणि खसखस असलेली ही थंडाई शरीरातील उष्णता कमी करण्यास मदत करते.
शाही थंडाई रेसिपी
थंडाई मसाला तयार करण्यासाठी
साहित्य-
बदाम-१५-२०
काजू-१०-१२
पिस्ते- १०-१२
कलिंगडाच्या बिया-२ मोठे चमचे
खसखस-१ मोठा चमचा
बडिशेप- १ मोठा चमचा
काळी मिरी- ८-१० दाणे
वेलची- ५-६ नग
वाळलेल्या गुलाबाच्या पाकळ्या-१ मोठा चमचा
केशर- ७-८ काड्या
थंडाई बनवण्यासाठी इतर
साहित्य-
दूध-१ लिटर
साखर-अर्धी वाटी (किंवा चवीनुसार)
कृती-
सर्वात आधी वरील सर्व मसाल्याचे साहित्य कोमट पाण्यात किमान ४ ते ५ तास भिजत ठेवा. भिजवलेले सर्व साहित्य पाणी निथळून मिक्सरमध्ये घ्या. त्यात थोडे दूध घालून एकदम गुळगुळीत पेस्ट तयार करा. एका मोठ्या पातेल्यात १ लिटर दूध गरम करायला ठेवा. त्यात साखर आणि केशराच्या काड्या घाला. दुधाला एक उकळी आली की गॅस मध्यम करा. तयार केलेली थंडाईची पेस्ट दुधात घाला आणि ५-७ मिनिटे मंद आचेवर सतत हलवत राहा, जेणेकरून मसाल्याचा स्वाद दुधात उतरेल. दूध थोडे घट्ट झाले की गॅस बंद करा. थंडाई पूर्णपणे गार होऊ द्या. त्यानंतर तिला किमान २-३ तास फ्रिजमध्ये ठेवा. थंडगार थंडाई ग्लासमध्ये ओता. वरून गुलाबाच्या पाकळ्या आणि पिस्त्याचे काप घालून सजवा.
खास टिप्स
गाळून घेणे: जर तुम्हाला थंडाई एकदम स्मूथ हवी असेल, तर सर्व्ह करण्यापूर्वी ती सुती कापडाने किंवा गाळणीने गाळून घ्या.
गुलाबाचा स्वाद: अधिक चांगल्या सुगंधासाठी तुम्ही यात १ चमचा गुलकंद किंवा रोझ सिरप देखील घालू शकता.
इन्स्टंट पद्धत: जर वेळ कमी असेल, तर वरील मसाल्याची पावडर करून ती दुधात उकळूनही थंडाई बनवता येते.
अस्वीकरण (Disclaimer) : या लेखात दिलेली माहिती आणि उपाय सामान्य माहितीवर आधारित आहे.या माहितीची पूर्णता, विश्वासार्हता आणि अचूकता याबाबत वेबदुनिया कोणतीही हमी देत नाही. अधिक माहितीसाठी संबंधित तज्ज्ञांचा सल्ला घ्यावा.
Edited By- Dhanashri Naik
