बंगाली फिश करी, ज्याला 'माछेर झोल' असेही म्हणतात, हा बंगालमधील अतिशय लोकप्रिय आणि पारंपरिक पदार्थ आहे. ही करी चवीला हलकी, पाचक आणि चविष्ट असते.
साहित्य-
मासे-५०० ग्रॅम रोहू किंवा कतला मासे
बटाटे-२ मध्यम लांब फोडी केलेले
मोहरीचे तेल- ४-५ मोठे चमचे
हळद- १ चमचा
लाल तिखट-१-२ चमचे
जिरे पूड-१ चमचा
धने पूड- १ चमचा
आले पेस्ट-१ मोठा चमचा
टोमॅटो- १ मोठा (बारीक चिरलेला)
हिरव्या मिरच्या-२-३ (मधोमध चिरलेल्या)
कलौंजी-अर्धा चमचा
कोथिंबीर
मीठ चवीनुसार
कृती-
मासे मॅरिनेट करणे
मासे स्वच्छ धुवून कोरडे करा. त्यावर अर्धा चमचा हळद आणि थोडे मीठ चोळून १५-२० मिनिटे बाजूला ठेवा.
मासे आणि बटाटे फ्राय करणे
कढईत मोहरीचे तेल धूर येईपर्यंत गरम करा. आता त्यात मासे टाकून दोन्ही बाजूंनी सोनेरी रंगाचे होईपर्यंत फ्राय करून एका ताटात काढून घ्या. त्याच तेलात बटाट्याच्या फोडीही थोड्या हळद-मिठासह तळून घ्या.
फोडणी तयार करणे
उरलेल्या तेलात कलौंजी आणि हिरव्या मिरच्या टाका. आता त्यात आल्याची पेस्ट घालून कच्चा वास जाईपर्यंत परता. त्यानंतर चिरलेला टोमॅटो घालून तो मऊ होईपर्यंत शिजवा.
मसाला तयार करणे
एका छोट्या वाटीत हळद, तिखट, जिरे पूड आणि धने पूड थोडे पाणी घालून मिक्स करा. ही पेस्ट कढईत टाका आणि मसाल्याला तेल सुटेपर्यंत परता.
करी शिजवणे
मसाला परतून झाल्यावर त्यात २ वाट्या गरम पाणी आणि तळलेले बटाटे घाला. चवीनुसार मीठ टाका. पाण्याला उकळी आली की झाकण ठेवून बटाटे ८०% शिजेपर्यंत मध्यम आचेवर ठेवा.
मासे घालणे
आता त्यात फ्राय केलेले मासे हळूवार सोडा. पुन्हा ५ मिनिटे मंद आचेवर शिजवा जेणेकरून माशांमध्ये मसाल्याची चव उतरेल.
फिनिशिंग
शेवटी वरून बारीक चिरलेली कोथिंबीर टाका आणि गॅस बंद करा.
खास टिप्स
जर तुम्हाला मोहरीच्या तेलाचा उग्र वास आवडत नसेल, तर तेल कडक गरम करा आणि मग त्यात पदार्थ टाका.
करीमध्ये नेहमी कोमट किंवा गरम पाणी वापरा, यामुळे करीची चव आणि रंग टिकून राहतो.
ही फिश करी गरमागरम पांढऱ्या भातासोबत खाल्ल्यास त्याची खरी चव समजते.
अस्वीकरण (Disclaimer) : या लेखात दिलेली माहिती आणि उपाय सामान्य माहितीवर आधारित आहे.या माहितीची पूर्णता, विश्वासार्हता आणि अचूकता याबाबत वेबदुनिया कोणतीही हमी देत नाही. अधिक माहितीसाठी संबंधित तज्ज्ञांचा सल्ला घ्यावा.
Edited By- Dhanashri Naik
