ऑनलाइन गेममध्ये १३ वर्षीय मुलाने १४ लाख गमावले, वडिलांच्या भीतीने गळफास घेतला
Online Game : उत्तर प्रदेशची राजधानी लखनऊमधील एका बातमीने पालकांना विचार करायला भाग पाडले आहे. राजधानीतील मोहनलालगंज परिसरातील एका १३ वर्षीय मुलाने सोमवारी ऑनलाइन गेममध्ये १४ लाख रुपये गमावल्यानंतर गळफास घेऊन आत्महत्या केल्याचा आरोप आहे. पोलिसांनी ही माहिती दिली आहे.
पोलिसांच्या म्हणण्यानुसार, मृताचे नाव यश कुमार (१३) असे आहे, जो मोहनलालगंज पोलिस स्टेशन परिसरातील धनुवासद गावचा रहिवासी आहे.
यश कुमार सहावीत शिकत होता
यश कुमारने त्याचे वडील सुरेश कुमार यादव यांच्या बँक खात्यातून एकूण १४ लाख रुपये खर्च केले होते. सोमवारी सुरेश कुमार बँकेतून पैसे काढण्यासाठी गेले असता त्यांना सांगण्यात आले की खात्यात शिल्लक नाही. बँक मॅनेजरकडून ही माहिती मिळाल्यानंतर सुरेश कुमार घरी परतले आणि त्यांनी कुटुंबाला ही गोष्ट सांगितली. त्यावेळी यश कुमारही घरी होता.
यशने अभ्यासाचे निमित्त करून छतावर गळफास घेतला
वडिलांना संपूर्ण प्रकरण कळल्यानंतर यश अभ्यासाच्या बहाण्याने छतावरील एका खोलीत गेला आणि त्याने गळफास घेऊन आत्महत्या केली. पोलिसांनी दिलेल्या माहितीनुसार, रात्री यशची बहीण गुनगुन त्या खोलीत गेली तेव्हा तिला तिचा भाऊ फासावर लटकलेला आढळला. तिच्या ओरडण्या आवाज ऐकून कुटुंबातील इतर सदस्य छतावर पोहोचले आणि यशला खाली आणण्यात आले. पोलिसांनी सांगितले की त्याला सामुदायिक आरोग्य केंद्रात नेण्यात आले, जिथे डॉक्टरांनी त्याला मृत घोषित केले. एसएचओने सांगितले की मृताचा मृतदेह शवविच्छेदनासाठी पाठवण्यात आला आहे आणि प्रकरणाची चौकशी सुरू आहे.
