मध्य प्रदेश : देवासमध्ये फटाक्यांच्या कारखान्यात भीषण दुर्घटना, ३ जणांचा मृत्यू

मध्य प्रदेश मधील देवासपासून सुमारे २० किलोमीटर अंतरावर असलेल्या टोंक कलाजवळील फटाक्यांच्या कारखान्यात गुरुवारी आग लागली. मोठ्या स्फोटांच्या आवाजाने परिसर हादरला. यात तीन कामगार ठार झाले आणि २३ हून अधिक जण जखमी झाले.

फटाक्यांच्या कारखान्याच्या परिसरात धुराचे लोट पसरले होते आणि जवळच लोकांची गर्दी जमली होती. जखमींना देवास जिल्हा रुग्णालयात दाखल करण्यात आले आहे. गंभीर जखमी रुग्णांना इंदूरला पाठवण्यात आले आहे. मृतांचा आकडा वाढण्याची शक्यता आहे. हे कामगार बिहारमधील अररिया जिल्ह्यातील असल्याचे वृत्त आहे.

देवासचे खासदार महेंद्र सिंह सोलंकी यांनी 'एक्स' या सोशल मीडिया साईटवरील एका पोस्टमध्ये म्हटले आहे, "देवासच्या टोंक कला परिसरातील फटाक्यांच्या कारखान्यात झालेला भीषण अपघात अत्यंत दुःखद, हृदयद्रावक आणि क्लेशदायक आहे. या अपघातातील जीवितहानी आणि जखमी झाल्याची बातमी मन हेलावून टाकणारी आहे." या घटनेसंदर्भात वरिष्ठ प्रशासकीय अधिकारी सतत संपर्कात असून, अपघाताची निष्पक्ष आणि सखोल चौकशी करण्याचे निर्देश देण्यात आले आहे.

ते म्हणाले की, प्रशासन आणि मदत-बचाव पथके युद्धपातळीवर सातत्याने मदत आणि बचाव कार्य करत आहेत, जेणेकरून बाधित लोकांना तात्काळ उपचार आणि सर्वतोपरी मदत पुरवता येईल. या संकटाच्या वेळी, भारतीय जनता पक्षाचे सरकार पूर्ण संवेदनशीलता, आपुलकी आणि दृढनिश्चयाने बाधित कुटुंबांच्या पाठीशी उभे आहे. राज्य सरकार बाधित कुटुंबांना सर्वतोपरी मदत आणि आवश्यक साहाय्य पुरवेल. दिवंगत आत्म्यांना आपल्या पवित्र चरणी स्थान मिळावे आणि जखमींना शीघ्र बरे वाटावे, यासाठी बाबा महाकाल यांना प्रार्थना केली जात आहे.

Edited by-Dhanashri Naik